Cüneyt Arkın vəfat etdi - FOTO

Tanınmış türkiyəli aktyor Cüneyt Arkın (əsl adı  Fahrettin Cüreklibatır) vəfat edib.

"NTV" xəbər verir ki, aktyor 84 yaşında həyatla vidalaşıb.

 Xatırladaq ki, Yeşilçamın unudulmaz sənətçisi Cüneyt Arkın 1937-ci ildə anadan olub. Əsl adı Fahrettin Cüreklibatur olan aktyor İstanbul Universitetinin Tibb fakültəsini bitirib. 1963-cü ildə “Artist” jurnalının təşkil etdiyi kino rəssamları müsabiqəsinə qatılıb və birinci mükafata layiq görülüb. Karyerasında dönüş nöqtəsi 1963-cü ildə hərbi xidmətdə olarkən 1-ci Hava Reaktiv Bazasında rejissor Halit Refiqlə tanış olmasıdır.
Əsgərliyi başa çatdıqdan sonra 1964-cü ildə Halit Refiqin çəkdiyi "Qurbet Kuşları" filmi ilə kinoya addım atıb.
1964-cü ildə Tibb fakültəsində tanış olduğu Gülər Mocanla ailə həyatı qurub və 1966-cı ildə qızları Filiz dünyaya gəlib.
O, Türkan Şoray, Hülya Koçyiğit, Fatma Girik və Filiz Akınla onlarla filmdə rol alıb.
Romantik filmləri ilə tanınsa da, əsl şöhrətinə Malkoçoğlu filmi ilə çatıb. O, kaskadyorlardan istifadə etməyi tamaşaçını aldatmaq kimi gördüyündən filmlərində aksiyon səhnələrii özü canlandırıb.
Arkın 1970-ci ildə ikinci dəfə ailə həyatı qurub. Bu evlilikdən onun Murat və Kaan adlı iki oğlu dünyaya gəlib.
Murat Arkın da atasının yolunu davam etdirərək aktyor olub.