Deputat: “Uşaq pulu bərpa edilməlidir”

“Dövlət qarşıdakı illərdə ilk növbədə  kənd təsərrüfatına daha çox diqqət lazımdır. Çünki  bu şəhəri, insanları, sizləri və bizləri dolandıran əli qabarlı kəndçilərdir. Bu torpağı da erməni işğalından azad edənlərin çoxu da o kəndçinin, o kasıbın balaları idi. O kasıbın balaları ki, Prezident İlham Əliyevə qəlbi və canı ilə bağlı oldu. Tarix boyu bütün imperiyaları da, varlı və kasıb dövlətləri də kasıb balaları saxlayıb, ucladıb, qalib edib”.

 “Ölkə.Az” xəbər verir ki, bunu millət vəkili Razi Nurullayev Milli Məclisdə 2021-ci il büdcə  müzakirəsi zamanı deyib.
Millət vəkili əlavə edib ki, o kasıbın iş qurmaq üçün güzəştli kənd təsərrüfatı kreditinə ehtiyacı var: “Ona görə də onların pul problemi olmamalıdır. Güzəştlərdən bir neçə faiz fermer yararlana bilir. Vəsait azdır. Amma, əksəriyyətin əsasən 2 min manatdan 10 min manata kimi tam güzəştli kreditə ehtiyacı var. Daha gedib banklardan 17-29 faizə kredit götürüb öz evlərini öz əlləri ilə yıxa bilməzlər ki... Bəlkə yalan danışıram?

Ikinci təklif etdiyim məsələ uşaq pulunu bərpası ilə bağlıdır. Populizm olmasın deyə, mənə mümkün olmayan şeyi deyib özünə siyasi xal qazanır deməsinlər deyə, deputat olandan susmuşam ki, uşaq pulu sözünü tribunadan dilimə gətirməyim və gətirmədim. Hərçənd ki, deputat seçkilərində əsas vədim uşaq pulu məsələsinin qaldırıması idi. Söz vermişdim ki, birinci plenar iclasda qaldıracam. Bu il keçdi, amma növbəti ilin büdcəsində uşaq pulu mütləq olmalıdır. Bu torpağı, bu vətəni saxlayan, bizə zəfər sevincini yaşadan, Ali Baş Komandanın yanında qaya kimi möhkəm dayanıb əmirlərini müntəzəm yerinə yetirən o kəndçilərin, o kasıbların, 5-10 manat uşaq pulu tələb edənlərin övladları idi. Hər zaman belə olub, belə də gedəcək. Amma, biz heç olmasa vicdan əzabı çəkməyək. Prezident İlham Əliyevin, Birinci vitse-prezidentin xalqın rifah içində yaşaması üçün iradəsi var, istəyi var, bizim hamımızdan çox onlar bunu istəyir. Hökumətin işi isə bunu həll etməkdir. Daş-divar hörmək, rəng çəkmək, bəzək-düzək etmək, dövlət idarələrinə möhtəşəm, gözoxşayan idarələr tikmək lazımdır, amma xalqın rifah içində yaşaması daha vacibdir”.
Deputat onu da əlavə edib ki, quru, zinə torpaq üstündə yaşayan, evinin içində başına yağış tökən, övladına təhsil vermək üçün müəllim tutmağa imkanı çatmayan ailəni başa düşmək və onun ehtiyacına uyğun büdcə yaratmaq üçün gərək onunla bir yerdə o kirli yorğan-döşəkdə yatasan, gərək onun kimi sənin də ayağın palçığa batsın, gərək onun kimi sənin də paltarından kərmə peçinin hisindən hopan pis qoxu gəlsin, gərək sən də bu qış günündə dişlərini soyuq su ilə fırçalayasan, ayda-ildə bir dəfə hamamda yuyuna biləsən: “Bunu etməsək, xalqı başa düşə bimərik”.