İrəvan 5 aprelə qədər savaşa başlamaq niyyətindədir: ABŞ, Avropa Birliyi və Ermənistan niyə hərbi təxribatda maraqlıdır

ABŞ və Avropa Birliyinin Ermənistana təhlükəsizlik təminatı vermək üçün rəsmi İrəvanın hərbi təxribatlarında maraqlı ola biləcəyi qətiyyən istisna deyil... Ancaq rəsmi Bakının Ermənistanla yanaşı, onun beynəlxalq himayədarlarının da məsuliyyətini qabartması, o deməkdir ki, hərbi təxribat törədərək, günahı Azərbaycanın üzərinə atmaq niyyəti qətiyyən baş tutmayacaq...
Ermənistanın yeni hərbi təxribatlara hazırlaşdığı barədə məlumatlar artıq təsdiqlənməyə başlayıb. Belə ki, rəsmi İrəvanın son vaxtlar konstruktiv mövqe tutmağa üstünlük verməsi daha çox aldadıcı manevr təsiri bağışlayır. Hər halda, Paşinyan hakimiyyətinin bəyanatları ilə davranışları kəskin ziddiyyət təşkil edir. Və son günlər bu kəskin ziddiyyətlər daha qabarıq şəkildə müşahidə olunmaqdadır.

Məsələ ondadır ki, Ermənistan baş naziri Nikol Paşinyan fevral ayının sonlarında erməni toplumuna gələcəyə yönəlik "böyük ümidlər" paylamağa çalışırdı. Erməni baş nazir mart və aprel aylarında baş verəcək hadisələrin Ermənistanın gələcək taleyi və təhlükəsizliyi üçün həlledici xarakter daşıyacağını bildirmişdi. O, xüsusilə də, aprel ayında Ermənistanın təhlükəsizliyinin təmin edilməsi istiqamətində önəmli addımların atılacağını vurğulamışdı. Və həmin vaxt erməni baş nazirin dedikləri müəyyən mənada, şəxsi maraqlara hesablanmış piar kimi görünürdü.

Bütün bunların ardınca baş nazir Nikol Paşinyan gözlənilmədən Azərbaycanın dörd kəndinin geri qaytarılmasının vacibliyini gündəmə gətirdi. Ardınca həmin kəndlərin sakinləri ilə görüşüb, əks halda, Azərbaycanın yeni müharibəyə başlayacağını sübut etməyə çalışdı. Əlbəttə, hələ də Ermənistanın işğalı altında qalan dörd kəndin geri qaytarılmasının vacibliyi barədə deyilənlər konstruktiv mövqe təsiri bağışlayır. Ancaq erməni baş nazirin rəsmi Bakının yeni savaş üçün bəhanə axtardığı barədə iddiaları isə Azərbaycana qarşı böhran atmaqdan başqa bir şey deyildi.

Düzdür, həmin vaxt erməni baş nazirin bu ziddiyyətli açıqlamaları daha çox rəsmi İrəvanın Ermənistan cəmiyyətini Azərbaycanla yeni müharibə təhlükəsi ilə qorxudaraq, dörd kəndin qaytarılmasına daxili müqaviməti qırmaq cəhdi kimi də izah olunurdu. Ancaq indi məlum olur ki, bu, heç də belə deyilmiş. Əksinə, baş nazir Nikol Paşinyan həmin ziddiyyətli açıqlamalarla aldadıcı manevrlər edərək, hansısa önəmli proses üçün əlavə zaman qazanmağa çalışırmış. Və artıq erməni baş nazirin manipulyasiyalarının arxasında gizlənən əsas niyyət ifşa edilmiş durumdadır.

Baş nazir Nikol Paşinyanın eyham vurduğu Ermənistan üçün taleyüklü aprel gözləntisinin məhz ayın 5-də keçirilməsi planlaşdırılan ABŞ, Avropa Birliyi və Ermənistan arasında ortaq konfransının olduğu artıq məlumdur. Erməni baş nazirin manipulyasiyaları da elə bu ortaq konfransa hesablanıb. Belə ki, rəsmi İrəvan bu müddətə qədər Ermənistanı konstruktiv tərəf kimi təbliğ etməyə çalışır. Eyni zamanda, baş nazir Nikol Paşinyan ortaq konfrans çərçivəsində ABŞ və Avropa Birliyindən Ermənistan üçün sənədləşdirilmiş təhlükəsizlik təminatı qoparmağı da hədəfləyir. Bu səbəbdən də, Azərbaycanın "konstruktiv" Ermənistana qarşı yeni savaşa hazırlaşması barədə uydurma iddialara ehtiyac duyur.

Ancaq erməni baş nazir ABŞ və Avropa Birliyini Azərbaycanın yeni savaşa hazırlaşdığına inandırmağın qətiyyən asan olmayacağını da anlamamış deyil. Üstəlik, bəzi erməni mənbələri rəsmi İrəvanın böyük ümidlərinə baxmayaraq, ABŞ və Avropa Birliyinin Ermənistana təhlükəsizlik təminatı verməyə o qədər də həvəsli olmadığını vurğulayırlar. Onların qənaətinə görə, Qərbdə bundan tam imtina olunmasa da, hər halda, müəyyən tərəddüdlər hələ qalmaqdadır. Və indi baş nazir Nikol Paşinyan üçün bu tərəddüdləri arxa plana keçirtmək əsas hədəfə çevrilib.

Təbii rəsmi İrəvan indiki situasiyada qısamüddətli hərbi toqquşmaların Ermənistana Qərbin təhlükəsizlik təminatını qazandıra biləcəyi qənaətindədir. Ona görə də, Paşinyan hakimiyyəti aprelin 5-də baş tutacaq ortaq konfransa qədər mütləq sərhəd toqquşmalarına can atır. Rəsmi İrəvan çalışır ki, Azərbaycana qarşı hərbi təxribat törətsin, sonradan isə rəsmi Bakını günahlandıra bilsin. Bu haldasa, Ermənistanın yeni savaş vəziyyəti ilə üzə-üzə olduğunu qabardaraq, ABŞ və Avropa Birliyindən təhlükəsizlik təminatı qopara biləcəyinə ümid bəsləyir.

Maraqlıdır ki, Paşinyan hakimiyyəti aprelin 5-nə qədər planlaşdırdığı hərbi təxribatların hazırlıq prosesinə də başlayıb. Belə ki, Ermənistanın Azərbaycanla sərhəd bölgəsinə yenə canlı qüvvə və hərbi texnika topladığını sübut edən video görüntülər yayılıb. Yəni, Paşinyan hakimiyyətinin manipulyativ planları müəyyən mənada, artıq ifşa edilib. Üstəlik, ortaq konfrans ərəfəsində belə bir uğursuzluq rəsmi İrəvan üçün "böyük ümidlər"in boşa çıxmasına da yol aça bilər.

Ona görə də, Ermənistan Müdafiə Nazirliyi isterik şəkildə əl-ayağa düşüb, canlı qüvvə və hərbi texnikanın Azərbaycanla sərhədə doğru hərəkətini təkzib etməyə çalışır. Ancaq Ermənistan Müdafiə Nazirliyinin verdiyi izahat və gətirdiyi arqumentlər məntiqsizdir. Çünki əsas izah ondan ibarətdir ki, guya bu, Ermənistanın sərhədə qoşun toplaması yox, sadəcə, yeni hərbi sürücülərin təlim prosesinin video görüntülərdir.

Ancaq Ermənistan Müdafiə Nazirliyi yeni sürücülərə təlim keçərkən, niyə hərbi avtomobilin silahlı əsgərlərlə dondurulduğuna heç bir aydınlıq gətirməyib. Digər tərəfdən, yeni sürücülərə təlim keçmək üçün avtomobilin qoşquları üzərində zirehli hərbi texnikaya, artilleriya qurğularına hansı səbəbdən ehtiyac duyulması da suallar doğurur. Ən əsası isə yeni sürücülərin təlim keçməsi üçün hansı səbəbdən canlı qüvvə və hərbi texnika yüklənmiş avtomobil karvanının Azərbaycanla sərhəd bölgəsinə istiqamət alması da izah olunmalıdır. Və belə anlaşılır ki, rəsmi İrəvan məntiqsiz yalanlar uydurarkən, hər kəsi onlara inandıra biləcəyi qədər sadəlövh hesab edir.

Təbii ki, rəsmi Bakı bütün fəaliyyəti təxribatlardan ibarət olan Ermənistanın uydurma izahatlarına inanmamaqda tamamilə haqlıdır. Çünki rəsmi İrəvanın dediklərinin əksinə olaraq, mövcud sübutlar tamamilə fərqli niyyətlərdən xəbər verir. Hər halda, Ermənistanın aprelin 5-nə qədər Azərbaycana qarşı hərbi təxribat törətməyə hazırlaşdığı açıq-aşkar nəzərə çarpır.

Hətta ola bilər ki, ABŞ və Avropa Birliyi də Ermənistana təhlükəsizlik təminatı vermək üçün rəsmi İrəvanın hərbi təxribatlarında maraqlı olsun. Bu səbəbdən də, Azərbaycanın Müdafiə Nazirliyi rəsmi İrəvanın törətməyə hazırlaşdığı hərbi təxribatlara görə həm Ermənistanın, həm də onun beynəlxalq himayədarlarının məsuliyyət daşıyacağını bəyan edərkən, tamamilə məntiqə əsaslanır. Və bütün bunlardan sonra Ermənistanın hərbi təxribat törədərək, günahı Azərbaycanın üzərinə atmaq niyyəti baş tutmayacaq.(Yeni Müsavat)