Uğurlu əməliyyat sülhə ümid verir
22-09-2023, 14:59. Разместил: admin
24 saatlıq antiterror əməliyyatı uğurla başa çatdıqdan sonra Müzəffər Ali Baş Komandan, cənab Preizent İlham Əliyev xalqa Müraciətində dedi: “Dünənki terror aktı bu sıradan olan hadisə idi. Laçın sərhəd-buraxılış məntəqəsi qurulmayana qədər İkinci Qarabağ müharibəsindən sonra Ermənistandan Azərbaycanın Qarabağ bölgəsinə qanunsuz olaraq minalar gətirilmiş və müxtəlif yerlərdə basdırılmışdır. Bir müddət bundan əvvəl Azərbaycan Silahlı Qüvvələri tərəfindən aşkarlanmış minalar Rusiya sülhməramlı kontingentinin və Rusiya-Türkiyə Monitorinq Mərkəzinin nümayəndələrinə göstərilmiş və onlardan ciddi tədbir görülməsi tələb edilmişdir. Bu minalar 2021-ci ildə Ermənistanda istehsal olunmuş minalardır. Yəni, bu, bir daha onu göstərir ki, İkinci Qarabağ müharibəsindən sonra məqsədyönlü şəkildə Azərbaycana qarşı terror aktlarını həyata keçirmək üçün bu minalar gətirilmişdir.
Azərbaycan dərhal lazımi addımlar ataraq düşməni layiqincə cəzalandırmışdır. Lokal xarakterli antiterror tədbirlərinə başlanıldı və qarşıda duran bütün vəzifələr cəmi bir gün ərzində yerinə yetirildi. Terrorçular cəzalandırıldı və bir daha Ermənistana göstərildi ki, onların istənilən təxribatına layiqli cavab veriləcəkdir.”
Bəli, bu həqiqəti ermənilər və onların dəmtutanları çoxdan dərk etməliydilər. Lakin təəssüf ki, nə erməni xisləti, nə də dəmtutanların iştahası buna imkan vermədi. İş o həddə çatdı ki, Ermənistan rəhbərliyi və qondarma xunta rejimi onlara dövlət quran, himayəsində bəsləyən Rusiyaya belə kəllə atmağa başladılar. Cənab Prezidentin qeyd etdiyi kimi harınlayan və quduran erməni liderləri Üçtərəfli Bəyanatın 4-cü maddəsinin tələblərini hər vəchlə yerinə yetirməkdən boyun qaçıraraq daha da irəli getdilər və mina terroru tətbiq etməklə xeyli mülki vətəndaşımızın, əsgərimizin şəhid olmasına bais oldular. Azərbaycan xalqının səbrini sınağa çəkməyin dadını unudan bu riyakarlar ın “dəmir yumruğu” bir daha dadması gərək idi və onlar istədiklərini aldılar. 24 saat davam gətirməyə belə gücü çatmayan bu harın dəstə zor qarşısında yalvarmağa, vasitəçilərə minnətçi düşməyə başladılar.
Cənab Prezident bu prosesi açıqlayaraq qeyd etdi: “Əməliyyatın uğurlu gedişatı təbii ki, Ermənistan dövlətini və onun himayəsi altında fəaliyyət göstərən qanunsuz xunta rejimini ciddi təşvişə salmışdır. Əməliyyatdan bir qədər sonra bizə vasitəçilər tərəfindən müxtəlif qeyri-müəyyən siqnallar gəlməyə başlamışdır və bizim Silahlı Qüvvələrimizin uğurlu irəliləyişi nəticəsində bu siqnallar daha intensiv xarakter almışdır. Bu gün səhər beynəlxalq tərəfdaşlardan bizə verilən məlumat ondan ibarət idi ki, qanunsuz silahlı birləşmələr, Ermənistan ordusunun bu birləşmələri artıq bizim şərtlərimizi qəbul etməyə hazırdırlar. Bizim şərtlərimizi isə mən dünən mənə zəng etmiş Amerika Birləşmiş Ştatlarının Dövlət katibinə çatdırmışdım. Məndən soruşuldu ki, antiterror tədbirlərini dayandırmaq üçün nə lazımdır? Mən dedim ki, Ermənistan ordusunun bizim ərazimizdə qanunsuz məskunlaşmış birləşmələri silahları yerə qoymalı, tərk-silah olunmalı, bizim ərazimizdən tamamilə çıxarılmalıdır və eyni zamanda, bütün silahları və texnikaları təhvil verməlidirlər. Ancaq o təqdirdə Azərbaycan antiterror tədbirlərini dayandıra bilər. Əks-təqdirdə sona qədər gedəcəyik və düşmən bizim gücümüzü də, qətiyyətimizi də yaxşı bilir.”
Yəqin ki bundan sonra ermənilər anlayar ki, uzaq qohumdan yaxın qonşu yaxşıdır. Əgər bu həqiqəti anlaya bilsələr bölgədə barış olar, əmin-amanlıq olar. Azərbaycaan xalqının əleyhinə olmazın yalanlar uydurub pul xərcləməkdənsə, o sərmayəni ölkələrinin inkişafına xərcləsələr onlar da bir güzəran qura bilərlər, bölgəmiz də rahat nəfəs alar. Bunu dərk etmək o qədər də zor bir iş deyil. Yox dərk edə bilmirlərsə biz bunun yolunu bilirik və zaman-zaman da onlara başa salırıq.
Azərbaycanın Prezidenti cənab İlham Əliyev tarixə qovuşmuş hadisələri indiyə qədər yaşanmış proseslərin nəticəsi kimi dəyərləndirərək bundan sonra irəli baxmağın, inkişafa, quruculuğa istiqamət götürməyin vacibliyini diqqətə çatdırdı: “İndi isə əminəm ki, bölgəmizdə yeni vəziyyətin yaranması labüddür. Çünki kriminal xunta rejimi təslim olandan sonra bu gərginlik mənbəyi, bu zəhər yuvası artıq tarixdə qalır və Qarabağda yaşayan erməni əhalisi də nəhayət rahat nəfəs ala bilər. Bunu mən demişəm və bir daha demək istəyirəm, Qarabağın erməni əhalisi bizim vətəndaşlarımızdır. Sadəcə olaraq, erməni millətçiləri, müharibə cinayətkarları, Ermənistanın və Qarabağın dırnaqarası rəhbərləri o insanları girov götürmüşdü, onların beyinlərini zəhərləmişdi. Azərbaycan haqqında, Azərbaycan xalqı haqqında olmazın yalanlarını uydurub onların beyinlərinə doldurmuşdur, onların beyinlərini zəhərləmişdir. Mən əminəm ki, Qarabağda yaşayan erməni əhalisi tezliklə yaxşılığa doğru dönüşü görəcək. Çünki bizim niyyətimiz sülh, qarşılıqlı anlaşma, qarşılıqlı hörmət əsasında birgə həyat qurmaqdır. Bizim erməni xalqı ilə heç bir problemimiz yoxdur, ədavətimiz də yoxdur.”
30 il bundan əvvəl Yevlxa qədər gəlib Azərbaycanın neft-qaz infrastrukturunu məhv edəcəklərini deyən ermənilər bu gün həqiqətən də Yevlaxa gələcəklər. Qalib kimi yox, bizim şərtlərimizi dinləmək üçün. Bəli, ilahi ədalət təcəlla edəndə arzular yerinə yetir. Yevlaxın həsrətini 30 il çəkən bu məxluqlar gəlib də Yevlaxda aman diləsinlər.
Müraciətini nikbin notlarla bitirən cənab Prezident sonda tezliklə sülh müqaviəsinin imzalanacağına ümidlər olduğunu bildirdi: “...Ermənistan dövlətinin dünən və bu gün sərgilədiyi mövqe ümidlər verir. Ümidlər verir ki, o gün uzaqda deyil - Azərbaycan və Ermənistan öz aralarında olan məsələləri tənzimləyəcək, sülh müqaviləsi imzalayacaq və Cənubi Qafqaz ölkələri üçtərəfli formatda gələcək əməkdaşlıq haqqında işləməyə başlayacaqlar. Ancaq bununla bərabər, onu da bildirməliyəm ki, bizə xor baxanlar, torpağımıza göz dikənlər, uğurumuzu həzm edə bilməyənlər heç vaxt, heç vaxt unutmasınlar ki, “dəmir yumruq” yerindədir və hər zaman yerində olacaq! Heç kim bizimlə diktat və ultimatum dilində danışa bilməz! Bunu heç kim unutmasın! Onu da unutmasın ki, Qarabağ Azərbaycandır!”
Rüstəm Nağıyev,
YAP Gədəbəy rayon təşkilatının sədri
Вернуться назад