Yevlaxda əməliyyat keçirilib, saxlanılanlar var - FOTO

Yevlax Rayon Polis Şöbəsinin əməkdaşları tərəfindən keçirilmiş tədbirlər nəticəsində narkotiklərin satışı ilə məşğul olan şəxslər saxlanılıb.

Daxili İşlər Nazirliyinin mətbuat xidmətinin Bərdə regional qrupundan verilən məlumata görə, Yevlax RPŞ-nin əməkdaşlarının həyata keçirdikləri əməliyyat-axtarış tədbirləri nəticəsində Yevlax şəhər sakini Hüseyn Mustafayev saxlanılaraq polis şöbəsinə gətirilib. Onun üzərinə baxış zamanı bir bükümdə heroin aşkar olunaraq götürülüb. 

 
H. Mustafayevin narkotiki əldə etdiyi şəxs də müəyyən edilib. Tədbirlərlə narkotiklərin qanunsuz dövriyyəsində şübhəli bilinən Yevlax rayon sakini, əvvəllər məhkum edilmiş Anar Qocayev saxlanılıb. Onun üzərinə baxış zamanı heroin və pisoxtrop maddə olan metamfetamin götürülüb.

Aparılan genişmiqyaslı tədbirlər nəticəsində A.Qocayevin narkotik maddələri Yevlax rayon sakini, əvvəllər məhkum edilmiş Xəyyam Həsənovdan aldığı müəyyən edilib. Keçirilmiş əməliyyat tədbirləri ilə X.Həsənov saxlanılıb. Onun yaşadığı ünvana baxış keçirilən zaman müxtəlif bükülülərdə 10 qramdan artıq heroin və 17 qramdan artıq metamfetamin, həmçinin, bir ədəd naqan tipli revolver və ona məxsus patron, bir ədəd qaz tapançası, ona məxsus iki ədəd qaz balonu və 30 ədəd patron, bir ədəd xəncər və üç ədəd elektron tərəzi aşkar edilərək götürülüb.
 
Saxlanılan hər üç şəxs barəsində Yevlax RPŞ-də araşdırmalar davam etdirilir.