Ermənilər YENİ MÜHARİBƏ İSTƏYİR? - GƏLİŞMƏ

Bir neçə gündür Ermənistanda hazırkı Nikol Paşinyan hökumətinə qarşı başlayan etirazlar özünün pik həddinə çatıb. Onlarla müxalifətçi həbs olunub.

Bəs Nikol Vovayeviç devriləcəkmi? İrəvandakı və ətraf bölgələrdəki mitinqləri kimlər planlaşdırır?

Suallarımızı politoloq Cümşüd Nuriyevə ünvanladıq. Politoloq Publika.az-a müsahibəsində dedi ki, bu ayın sonuna qədər Nikol Paşinyan istefa verə bilər.

Həmin müsahibəni təqdim edirik:

- Cümşüd müəllim, İrəvanda nə baş verir? Baş nazir Nikol Paşinyanın istefasını tələb edənlərin arxasında sizcə, kimlər dayanır?

- Əslində, İrəvanda keçirilən mitinqlər birmənalı şəkildə Rusiyanın kəşfiyyat orqanlarının hazırladığı bir mitinqdir. Mitinqlərin təşkilində Kremlin əsas məqsədi Ermənistanı itirməməkdir. Fikir verirsinizsə, ayın 2-dən 6-na qədər Nikol Paşinyan Amerika Birləşmiş Ştatlarında səfərdədir. Orada görüşlər keçirilir. Bu görüşlər Rusiyanın razılığı olmadığı üçün keçirildiyinə görə indi mitinqlərin sayı çoxalıb. Həm də həmin etiraz aksiyalarına toplaşanların sayını artırıblar. Eyni zamanda mitinqlərdə birmənalı şəkildə hazırkı baş nazirin istefası məsələsi qoyulub.

- Sizcə, Kreml İrəvandakı istəklərinə nail olmaq üçün daha hansı addımları atacaq?

- Bütün bunların fonunda vaxtilə Nikol Paşinyanın tərəfində olan adamları da tədricən pulla, təhdid və qorxutmaqla əks tərəfə çəkməyə çalışırlar. Yəni Rusiya İrəvanda öz hakim mövqeyini saxlamaq istəyir. ABŞ isə buna qarşı durur. Kremlin bu addımına yol vermək istəmir. Hadisələrin gedişi onu göstərir ki, Nikol Paşinyanın istefası baş tuta bilər. Paşinyanın istefasının baş tutması ilə istər-istəməz bölgədə yeni siyasi vəziyyət yaranacaq.

- Paşinyanın gedəcəyi təqdirdə Azərbaycan nələrə hazır olmalıdır? İrəvanda baş verənlər fonunda nələr dəyişə bilər?

- Azərbaycan baş verə biləcək bütün hadisələrə hər an hazır olmalıdır. Əgər belə bir addım atılsa, Rusiyanın hərbi elitası Azərbaycana qarşı da təxribatları artıracaq. Fikir verirsinizsə, may ayının birindən hər gün Kəlbəcər rayonunun əraziləri mütəmadi olaraq atəşə tutulur. Ermənilər Yuxarı Şorca kəndindəki mövqelərindən Yellicə və digər istiqamətlərdəki mövqelərimizi atəş altında saxlayırlar. Sözsüz ki, bu cür erməni təxribatlarının arxasında həm Rusiyanın hərbi kəşfiyyatı, həm də Kremlin hərbi elitası dayanır. Ümumiyyətlə, Rusiyanın imperiya ambisiyaları o qədər güclüdür ki, tək Ukrayna ilə gözləri doymur. Onlar Qafqaz regionunu da öz nəzarətlərində saxlamaq istəyirlər. Ona görə də burada “dəyənək” statusunda yenə də Ermənistan, təxribatçı ermənilər çıxış edirlər.

- Bu iğtişaşların arxasında “Qarabağ kartı” nə dərəcədə önəmli “rol oynayacaq”?

- Mitinqin başqa bir şüarı da var. Bu şüar yenidir. Son 20 ildə “Qarabağın qarabağlı ermənilər tərəfindən qorunmaması” məsələləri qabardılır. Etirazçılar “Koçaryan-Sarkisyan dueti”ni də bir kənara qoyurlar. Bu mənada keçmiş prezident Robert Koçaryanın oğlunun da həbs olunması heç də təsadüfi bir şey deyil. Qarabağ erməniləri də guya bu məsələ ilə “razılaşmırlar”. Yəni Ermənistan ərazisində baş verənlərlə. Görünən odur ki, İrəvanda, eləcə də Ermənistanın digər bölgələrində vəziyyət kifayət qədər gərginləşib. Bu gərgin vəziyyətdən Rusiya da yararlanmağa çalışacaq.

- İrəvanda baş verənlərin arxasında Rusiyadan başqa hansı ölkələrin barmağı ola bilər?

- Nəzərə alaq ki, Ermənistana təsir edəcək başqa qüvvələr də var. Söhbət bizim cənubdakı qonşumuzun daxilindəki müəyyən qüvvələrdən gedir. Yəni İranda hakimiyyətdə olan bəzi qüvvələrin narkobiznes fəaliyyətlərinin bəziləri pozulub. Onlar da onu həyata keçirməyə çalışacaqlar. Söhbət ondan gedir ki, bu ayın sonuna qədər Ermənistanın baş naziri Nikol Paşinyan istefaya göndərilə bilər.