10 idmançıya 1 medal - Cüdoçularımızdan DÇ-də uğursuzluq

Xəbər verdiyimiz kimi, Özbəkistanın paytaxtı Daşkənddə cüdo üzrə dünya çempionatı keçirilib. Azərbaycan cüdoçuları da bu yarışda iştirak edib. Komandamız mundiala 11 idmançı ilə yollanıb. Artıq komandamızın üzvlərindən 10-u dünya çempionatında mübarizəni başa vurub. 10 idmançımızdan yalnız Hidayət Heydərov bürünc medal qazanıb. 

Digər 9 cüdoçumuzdan bəziləri yalnız 1/4 finala qədər gələ bilib. 

“Qafqazinfo”nun məlumatına görə, bu Azərbaycan cüdoçularının son illərdə göstərdiyi ən zəif nəticələrdən biridir. Tokio-2022 Yay Olimpiya Oyunlarında da komandamız biabırçı çıxışla yadda qalmışdı. 

Komandanın liderlərindən Rüstəm Orucov isə heç ilk “3-lüy”ə düşə bilmədi. 

Bu gün isə mübarizəyə başlayan Məmmədəli Mehdiyev ilk görüşündən məğlubiyyətlə barışdı. 

Maraqlıdır ki, Olimpiya Oyunlarının medalçısı, dünya çempionu Səid Mollayi də Azərbaycan yığmasındakı ilk böyük turnirində medalsız qaldı. 

Ümumiyyətlə, Azərbaycan Cüdo Federasiyasında son dəyişikliklərdən sonra komandadan uğurlu çıxış gözlənilsə də, bu baş vermədi. Komandamızı dünya çempionatında medalsız qalmaqdan yalnız Hidayət Heydərov xilas edə bildi. 

İdmançılarımızdan yalnız -100 kq çəki dərəcəsində Zelim Kotsoyev qalıb ki, onun da sabah medal qazanmaq şansı çox aşağıdır. 

Yəni məşqçi Riçard Trautman da Azərbaycan cüdo yığması üçün çox şeyi dəyişə bilmədi. 

Əslində, cüdonun ən böyük problemi komandamızın orta yaş həddinin yuxarı olmasıdır. Demək olar ki, komandada yeni idmançıların sayı azdır və yeni cüdoçulara ehtiyac olduğu gün kimi aydındır. 

Qadın cüdosu isə həmişəki performansını ortaya qoyur və uğursuzluqdan heç cür çıxa bilmir.