Mübariz Əhmədzadə: “Vətən müharibəsi”ndə qazandığımız qələbə Azərbaycan tarixinin ən parlaq səhifəsidir
Zaqatala Rayonu İcra Hakimiyyətinin Başçısı Mübariz Əhmədzadə - Bu qələbə bizə tarixi və əzəli Azərbaycan torpağı olan “Qarabağ”ı qaytardı. Ordu və xalqın birliyi ilə yanaşı, bu 44 günlük “Vətən müharibəsi”ndə cənab prezidentin yürütdüyü uğurlu xarici siyasət və “Dəmir yumruq” əməliyyatı öz sözünü dedi. Prezident İ.Əliyev “Vətən müharibəsi” dövründə xarici media orqanlarına verdiyi müsahibələrlə həqiqətləri dünyaya çatdırmışdır. Qazandığımız qələbə sayəsində həm ərazi bütövlüyümüzü və həm də Azərbaycan xalqının nə qədər mübariz, həmrəy və nümunəvi xalq olduğunu bütün dünya ölkələri görmüşdür. Belə ki, müzəffər Azərbaycan ordusunun əzmi, mübarizliyi və dönməzliyi ilə əldə etdiyi tarixi qələbə dövlətimiz və xalqımızın mənafeyi baxımından çox önəmlidir. 30 ilə yaxın müddətdir ki, mənfur düşmənin tapdağı altında qalmış torpaqlarımızın azad edilməsi ilk olaraq Azərbaycan xalqının özünə inamını geri qazandırdı və xalqımızın öz prezidentinə və onun gücünə etibarını daha da gücləndirdi.
Torpaqlarımızın hər zərrəsi uğrunda canı, qanı bahasına vuruşan igid Azərbaycan əsgəri və xalqımızın birliyi sayəsində qazandığımız parlaq qələbəmiz gələcəyə yeni imkanlar yaradır. Bu imkanlardan biri işğaldan azad edilən ərazilərimizin zəngin iqtisadi potensialının olması və həmçinin kənd təsərrüfatı baxımından olan imkanlardır. Bu ərazilərimiz həmçinin məhsuldar torpaqlarla da zəngindir. Ən mühüm cəhətlərdən biri odur ki, işğaldan azad edilmiş ərazilərə cənab Prezidentin hər səfəri yeni quruculuq işlərinin təməlinin qoyulması ilə əlamətdar olur. Və göründüyü kimi azad olunmuş ərazilərimiz sürətlə bərpa ediləcək, Qarabağa böyük qayıdış ən yüksək səviyyədə həyata keçiriləcək.
“Vətən müharibəsi”ndə qazandığımız qələbə Azərbaycan tarixinin ən parlaq səhifəsidir.
Yaponiya hökumətinin dəstəyi ilə Zaqatalanın kəndində su təchizatı layihəsi icra olunub
Yaponiyanın Azərbaycandakı səfiri Cuniçi Vada iyulun 27-də Zaqatala rayonunda olub.
Yaponiyalı diplomat əvvəlcə rayon rəhbərliyi ilə görüşüb. Rayon icra hakimiyyətində keçirilən görüşdə səfirə Zaqatala rayonunun iqtisadiyyatı, mədəniyyəti, turizm potensialı, həmçinin Yaponiya hökumətinin dəstəyi ilə reallaşan layihələr barədə ətraflı məlumat verilib. Bildirilib ki, Yaponiyanın Azərbaycandakı səfirliyi ilə Zaqatala Rayon İcra Hakimiyyəti arasında əməkdaşlıq 2007-ci ildən uğurla davam etdirilir. Dost ölkənin qrant yardımı proqramı çərçivəsində indiyədək Zaqatalada məktəb tikintisi, tibb və ekologiya, su təchizatı və digər sahələri əhatə edən 10-dək layihə reallaşıb.
Zaqatalaya səfəri çərçivəsində səfir Cuniçi Vada Yaponiya hökumətinin “Ot kökləri və insan təhlükəsizliyi qrant yardımı proqramı” çərçivəsində rayonun Zəyəm kəndində həyata keçirilən “İçməli su təchizatı sisteminin inşası” layihəsinin icrasının başa çatması münasibətilə təşkil edilən mərasimdə iştirak edib. Diqqətə çatdırılıb ki, icrası yenicə başa çatan bu layihə üzrə işlər Yaponiyanın ölkəmizdəki səfirliyi ilə “Azərbaycan İcma inkişafı üzrə araşdırmalar, təlim və resurs Mərkəzi” İctimai Birliyi arasında imzalanan müqavilə əsasında yerinə yetirilib. Yaponiya hökumətinin “Zaqatala rayonunun Zəyəm kəndində içməli su təchizatı sisteminin inşası” layihəsi üzrə ayırdığı qrant yardımının ümumi məbləği 54 min 453 ABŞ dolları təşkil edib. Layihədən kəndin iki min nəfərədək sakini bəhrələnəcək.
İçməli su təchizatı sisteminin açılışını bildirən rəmzi lent kəsildikdən sonra mərasim iştirakçıları layihə çərçivəsində görülən işlərlə tanış olublar.
