Taliban Əfqanıstanı şah dövrünə qaytarır
30-09-2021, 11:07. Разместил: admin
Əfqanıstanda Taliban keçid dövrü hökuməti şahlıq dövrünün konstitusiyasına əsaslanacaq.
Ölkə.Az xarici KİV-ə istinadla xəbər verir ki, bunu keçid dövrünün ədliyyə naziri Əbdül Hakim Şeri deyib. O bildirib ki, Əfqanıstan konstitusiyası Kral Məhəmməd Zahir şahın dövründəki 1964-cü il konstitusiyanın bazası əsasında formalaşdırılacaq.
Nazir həmçinin söyləyib ki, sözügedən konstitusiyanın şəriət və Talibanın prinsiplərinə zidd olmayan maddələrinin hamısı yenidən tətbiq ediləcək.
Ə.H.Şeri qadınlara səsvermə və siyasətə atılmaq hüququ tanıyan 1964-cü il konstitusiyasının sözügedən maddələrinin tətbiq olunub-olunmaması ilə bağlı sualları cavablandırmayıb.
Qeyd edək ki, səlahiyyətlərin əksəriyyətinin şaha verildiyi bu konstitusiya Əfqanıstanda “monarxiya qanunu” adlandırılır.
Вернуться назад