Erməni gənc mənə yaxınlaşıb dedi ki... - Şevçenko
26-11-2021, 11:51. Разместил: admin
Bu yaxınlarda mən yeni çəkilmiş gözəl yol ilə Şuşaya getdim, orada oldum. Şuşa səfərində mən əsl möcüzələrlə rastlaşdım. Həmin möcüzələrin yaradılmasında Azərbaycan xalqının ruhunu bir daha duydum. Azad edilmiş Azərbaycan ərazilərində həmin yaradıcılıq ruhu və ölkənin iqtisadi gücü heyrət doğurur. Azərbaycan Prezidenti, Silahlı Qüvvələrinin Ali Baş Komandanı İlham Əliyevin iradəsi ilə görülən bu işlər xalqınız və ölkənizin perspektivlərinin göstəricisi kimi də diqqəti cəlb edir.
Musavat.com xəbər verir ki, bu sözləri məşhur rusiyalı jurnalist və ictimai xadim Maksim Şevçenko Heydər Əliyev Mərkəzində keçirdiyi görüşdə söyləyib. Rusiyalı jurnalist Şuşa təəssüratını ifadə edərək deyib: “Azərbaycan xalqı bu ölkədə yaşayan digər millətlərlə əsl birlik nümunəsi göstərən bir xalqdır. Azərbaycanlılar, talışlar, ləzgilər, avarlar, udinlər, ruslar, yəhudilər, ukraynalılar və digər xalqların bu unikal birliyi sizin ölkənizi daha cəlbedici və qüdrətli göstərir. Son bir ildə İlham Heydər oğlu böyük alicənablıq göstərərək Azərbaycan vətəndaşı olan, başqalarının iradəsi hesabına hazırkı situasiyaya düşən ermənilərə də o birliyə qoşulmaq üçün dəfələrlə çağırışlar edib. Bu çağırış Azərbaycan xalqının ürəyinin genişliyini dünya qarşısında bir daha nümayiş etdirir. Bu, Azərbaycan xalqının intellektual və zadəgan mahiyyətinin göstəricisidir”.
Azərbaycanlıların sivilizasiyasını Bakının küçələrində əyani görmək mümkündür - deyən Şevçenko fikrini belə davam etdirib:
“Təsadüfən həmsöhbət olduğum insanların erudisiyasına heyrətlənməyə bilmirsən. Siz öz ədəbiyyatınızla yanaşı, rus ədəbiyyatına, dünya ədəbiyyatına bələdsiniz, üstəlik genetik yaddaşınız azərbaycanlı mədəniyyətini zənginləşdirir”.
Rusiyalı siyasətçi 2020-ci il sentyabrın 27-də başlayan müharibəni xatırladaraq onunla bağlı bir epizoddan danışıb:
“Bu, keçənilki hadisələrin, Ermənistanla Azərbaycan arasında 44 gün çəkən müharibənin yenicə bitdiyi vaxtlarda olub. Yanacaqdoldurma məntəqəsində idim və bu məqamda bir erməni gəncinin mənə tərəf gəldiyini gördüm. Düşündüm ki, indi o, mənə hədyanlar yağdıracaq, amma belə olmadı. O, əksinə, mənə yaxınlaşıb dedi: “Mən hazırkı mövqeyinizə görə sizə təşəkkür etmək istərdim”. Niyə? - dedim, ermənilər elə hesab edirlər ki, mən azərbaycanlıların tərəfini tuturam. O isə cavabında heç də böyük əksəriyyətin o cür fikirləşmədiyini bildirdi: “Yox, sizin mövqeyiniz düzgündür, biz, ermənilər də istəyirik ki, Avropadakı xalqlar kimi birgəyaşayış prinsipləri ilə sülh, əmin-amanlıq şəraitində yaşayaq, bir-birimizi öldürməyək”. Bu fikirlərin təsdiqi olaraq rusiyalı siyasətçi müharibədəki məğlubiyyətdən sonra Ermənistanda keçirilən parlament seçkilərinin nəticələrini misal çəkdi: “Əgər Ermənistanda əksəriyyət belə fikirləşməsəydi, Nikol Paşinyanın partiyasına səs verməzdi”.
Almanlar Moskva ətrafına gəlib çıxmışdılar, lakin sovet xalqının iradəsini qıra bilmədilər, - deyən Maksim Şevçenko bunu belə izah edib:
“Ona görə ki, onlar alman xalqı ilə deyil, nasizm ilə döyüşürdülər. Bu, mənim birmənalı fikrimdir ki, Ermənistanla müharibədə də azərbaycanlıların qələbəsini şərtləndirən başlıca amil Azərbaycan xalqının ermənilərlə deyil, erməni faşizmi ilə döyüşdüyünə əminliyi idi. Yeri gəlmişkən, bu həqiqəti sizin Prezident, Ali Baş Komandan İlham Əliyev də dəfələrlə vurğulayıb”.
Rusiyalı jurnalist qeyd edib ki, işğal olunmuş ərazilərin azad edilməsindən sonra orada olan hər kəs erməni faşizminin mahiyyətini görüb. Xarabalıqlara çevrilmiş kənd və şəhərlərdə nə vaxtsa insan yaşadığını təsəvvür etmək belə çətindir: “Evlərin dağıdılması, təbiətin ağciyərləri olan yaşıllıqlara tutulan divan, hətta ağacların kökündən çıxarılması faşizmin göstəricisidir. Bunu, XX əsrdə o xalqın adından törədiblər ki, həmin xalq bu gün də genosidə məruz qaldığını iddia edir”.
Ermənilər arasında hazırkı tendensiyadan bəhs edən Maksim Şevçenko deyib: “Onlar 3 min və yaxud 5 min il əvvəl erməni çarı olmuş Tiqran barədə, erməni xalqının dövlətçiliyi barədə danışmağı sevirlər. Amma bugünkü reallıq başqa söz deyir”.
Вернуться назад