Paşinyanın devrilməsi prosesi başlayır - 22 sentyabrdan...

Ermənistandakı etiraz hərəkatının lideri, keşiş Baqrat Srbazan ötən gün parlament müxalifəti ilə görüş keçirib.

Modern.az-ın məlumatına görə, bu barədə "Joğovurd" qəzeti yazıb.

O, parlamentin “Hayastan” və “Şərəfim var” fraksiyaları ilə görüşüb. Görüş Ermənistan parlamentində baş tutub.

Qəzetin məlumatına görə, Baqratla müxalifət arasında görüş iki saata yaxın davam edib. "Hayastan" fraksiyasının rəhbəri Seyran Ohanyanın ofisində baş tutan görüşün təşəbbüskarı Baqrat olub.

Baqrat və parlament müxalifəti bundan əvvəl dəfələrlə görüşsə də, parlament binasında ilk dəfə idi ki, belə bir görüş keçirilirdi.

“Joqovurd” qəzetinin məlumatına görə, görüşün gündəliyinə sentyabrın 22-də keçiriləcək toplantı və Nikol Paşinyanın ictimai təzyiqlə hakimiyyətdən uzaqlaşdırılması məsələsi daxildir. Baqrat toplantıdan gözləntiləri ilə bağlı fikirlərini təqdim edib.

Ermənistanın müxalifət partiyaları həm parlamentdə, həm də küçə mübarizəsində hərəkata dəstək verməyə hazır olduqlarını bir daha təsdiq ediblər. Baqrat bu müddət ərzində müxtəlif sahələrin nümayəndələri ilə görüşün nəticələrini də təqdim edib, görülən işlərdən əvvəl hərəkatın gələcək fəaliyyəti də müzakirə olunub.

"Baqrat və müxalifət partiyaları bir daha təsdiq etdilər ki, hərəkatın və mübarizənin açarı ictimaiyyət arasında geniş konsolidasiyanı təmin etməkdir”, - qəzet yazır.

Qiyamçı keşiş bundan əvvəl Ermənistanın eks-prezidentləri Robert Köçəryan və Serj Sarkisyanla da görüşüb.

Qeyd edək ki, keşiş Baqrat Srbazan sentyabrın 22-də İrəvan idman-konsert kompleksində böyük toplantı keçirməyə hazırlaşır.

Baqrat Srbazanın hələ ki Ermənistan Respublikasının birinci prezidenti Levon Ter-Petrosyanla görüşə nail olmadığı bildirilib.