Kreml Lukaşenkonu aradan götürüb, Belarus ordusuna sahiblənmək istəyir - RLI

Kreml Belarus ordusunu Ukraynaya qarşı müharibəyə cəlb etmək üçün radikal variant planlaşdırıb. Plana əsasən Aleksandr Lukaşenkonu aradan götürülməsi və bu yolla Belarus ordusuna nəzarəti ələ keçirmək nəzərdə tutulur.

Belə bir iddia ilə Robert Lansinq İnstitutunun (RLI) analitikləri çıxış edib.

“Unian”ın yazdığına görə, Rusiya hərbi rəhbərliyindəki mənbələr Kremlin Lukaşenkonu aradan qaldırmaq barədə artıq qərar qəbul etdiyini təsdiqləyiblər.

Kreml sui-qəsd cəhdi uğursuz olsa belə, Lukaşenkonun qətlində “NATO kəşfiyyatının rəhbərliyi altında Ukrayna və Polşanın iştirakı” barədə uydurma sübutlar təqdim etməyi planlaşdırır. 

Rusiya Federasiyasının hərbi kəşfiyyatı yaxın günlərdə ya Belarus Prezidenti Aleksandr Lukaşenkonun həyatına qəsd, ya da onun təqlidi ilə ssenari hazırlamağa cəhd edə bilər. Bu əməliyyatın məqsədi Belarus liderini qorxutmaq, onu Rusiya tərəfində müharibəyə girmək əmrini verməyə sövq etmək olacaq.

Rusiya xüsusi xidmət orqanı artıq əməliyyat zamanı Lukaşenkonun öldürülməsi ssenarisi üzərində işləyir. 

Analitiklər hesab edir ki, bundan sonra Rusiya iki ordunu vahid komandanlıq altında birləşdirmək istədiyini istisna etmirlər.