Rusiyada Azərbaycan və Ermənistan liderlərinin görüşü planlaşdırılmır - Peskov

Yaxın vaxtlarda  Azərbaycan  və Ermənistan liderlərinin Rusiyada görüşü planlaşdırılmır.

Bunu jurnalistlərə açıqlamasında Rusiya prezidentinin mətbuat katibi Dmitri Peskov deyib.

"Yaxın vaxtlarda  belə görüş gözlənilmir", - Peskov Ermənistan və Azərbaycan liderləri ilə yaxın gələcəkdə Rusiyada görüşmək planları barədə sualı cavablandırarkən deyib.

Peskov əlavə edib ki, Rusiya Ermənistanla Azərbaycan arasında münasibətlərin tezliklə normallaşması, o cümlədən sülh müqaviləsinin hazırlanması üzərində işi daim davam etdirir.
Bundan əvvəl Azərbaycan prezidenti İlham Əliyev Ermənistanın baş naziri Nikol Paşinyanla dekabrın 7-də Brüsseldə nəzərdə tutulan görüşün baş tutmayacağını bildirib. İrəvanın Fransa prezidenti Emmanuel Makronun görüşdə iştirakı ilə bağlı şərti onu qane etməyib.

Peskov Rusiyanın öz platformasını danışqılar üçün təklif etməyə hazır olub-olmaması ilə bağlı sualı cavablandırarkən deyib: “Rusiya nəinki hazırdır, Rusiya daim münaqişənin tənzimlənməsində... və sülh müqaviləsinin imzalanmasında iki dövlətə kömək etmək üçün işini davam etdirəcəyini bəyan edir”.