Boris Consonla bağlı qalmaqala görə dörd köməkçisi ard-arda istefa verdi

Böyük Britaniyanın Baş naziri Boris Consonun ən yaxın köməkçilərindən dördü siyasətçinin qalmaqalı ilə bağlı artan təzyiqlər fonunda bir-birindən bir neçə saat sonra istefa verib.
Oxu.az xəbər verir ki, Conson təkcə onunla 14 il işləmiş müşavir Munira Mizranın deyil, həm də Dauninq-sritin kommunikasiyalar üzrə direktoru Cek Doylun, eləcə də baş nazir aparatının rəhbəri Den Rozenfildin və şəxsi katibi Martin Reynoldsun da dəstəyini itirib.

Daha əvvəl məlum olub ki, Consonun müşaviri Mizra baş nazirin deputat Key Starmerə qarşı ittihamlarına görə üzr istəməkdən imtina etdiyi üçün istefa vermək qərarına gəlib.

 Qalmaqal bazar ertəsi, yanvarın 31-də parlamentdə Dauninq-stritdəki ziyafətlə əlaqədar araşdırma ilə bağlı keçirilən iclasdan sonra baş verib. Starmer Consonu sorğu-sual edib, lakin baş nazir cavab vermək əvəzinə onu məşhur cinayətkar Cimmy Savileni baş prokuror kimi mühakimə etməməkdə günahlandırıb. Daha sonra Conson sözlərini geri götürüb, lakin üzr istəməkdən imtina edib.
Yanvarın sonunda Britaniyada Consonun əyləncə gecəsi ilə bağlı araşdırma dərc edilib. Karantin zamanı Dauninq-sritdə baş verən hadisələr etik standartların ciddi pozulması kimi tanınıb. Belə qərara gəlinib ki, Böyük Britaniyadakı epidemioloji vəziyyəti nəzərə alaraq, Baş nazirin iqamətgahında bəzi ziyafətlər təşkil olunduğu kimi keçirilməməli idi.

Siyasətçi parlamentdəki çıxışı zamanı ictimaiyyətdən üzr istəyib və istintaqın ümumi nəticələri ilə razılaşdığını bildirib.