Səttar Möhbalıyev: “Yaxın gələcəkdə “Böyük Qayıdış”ın reallaşması üçün bütün mövcud potensiallar səfərbər olunub”
5-05-2022, 18:22. Разместил: admin
“Yenilməz və qüdrətli Azərbaycan Ordusunun qəhrəmanlıq salnaməsinin parlaq səhfələrindən birini Zəngilan rayonunun işğaldan azad edilməsi təşkil edir. Sərhəd Qoşunlarımızın komandanlığı altında aparılan əməliyyat nəticəsində rayon qısa müddətdə işğalçılardan təmizləndi. Ümumilikdə Zəngilan döyüşləri nəticəsində Azərbaycan Silahlı Qüvvələri tərəfindən Zəngilan şəhəri, rayonun 4 qəsəbəsi və 49 kəndi işğaldan azad edildi. Bu döyüşlərdə Ordumuzun göstərdiyi misilsiz rəşadət düşmənin işğalçı qüvvələrinin sarsılmasına, ruh düşkünlüyünə, fərariliyin artmasına gətirib çıxardı. Həmçinin Silahlı Qüvvələrimiz düşmən üzərində psixoloji üstünlük qazanaraq digər rayonlarımızın işğaldan azad edilməsi prosesini daha böyük uğurla və yüksək ruhla davam etdirdilər”.
Bu fikirləri mətbuata açıqlamasında Azərbaycan Həmkarlar İttifaqları Konfederasiyasının (AHİK) sədri, Milli Məclisin deputatı Səttar Möhbalıyev deyib.
Onun sözlərinə görə, işğal müddətində Şərqi Zəngəzurun və Qarabağın digər əraziləri kimi, Zəngilan da düşmən barbarlığına məruz qalmış, demək olar ki, bütün tikililər, o cümlədən tarixi və dini memarlıq abidələri məhv edilmişdir: “Onlar xalqımıza məxsus olan milli-mənəvi dəyərlərin erməniləşdirilməsinə cəhd göstəriblər. Bunun mümkün olmadığını gördükdə isə onları dağıdıb, təhqir ediblər. Amma bu gün işğaldan azad edilmiş başqa rayonlarımız ilə bərabər Zəngilanda da kompleks şəkildə yenidənqurma-bərpa işləri aparılır. Burada da görülən işlər dövlətimizin başçısı cənab İlham Əliyevin diqqət mərkəzindədir. Prezident və birinci xanım Mehriban Əliyeva dəfələrlə Zəngilana səfərlər edərək quruculuq işləri ilə yerindəcə tanış olublar. Bu, onu göstərir ki, “Böyük Qayıdış” üçün bütün mövcud potensiallar səfərbər olunub. 1-ci, 2-ci və 3-cü Ağalı kəndləri “ağıllı” kənd pilot layihəsi çərçivəsində yenidən qurulur. Bu kəndlərdə müasir məktəb, uşaq bağçası, poliklinika tikilir. Ağalı kəndi Qafqazda müasir standartlara cavab verən ilk kənd kimi tarixə düşəcək. Burada “ağıllı tədris”, “ağıllı səhiyyə” və “ağıllı kənd təsərrüfatı” sistemləri də həyata keçiriləcək. Horadiz-Zəngilan-Ağbənd dəmir yolunun inşasını xüsusi olaraq vurğulamaq istərdim. Bu layihənin çox böyük strateji əhəmiyyəti var. Ən əsası dəmir yolu azad edilmiş torpaqlara həm vətəndaşların gəlməsi, həm də yüklərin daşınması üçün çox əhəmiyyətlidir. Hava limanının inşası isə rayonla yanaşı, ümumilikdə bölgənin beynəlxalq nəqliyyat-logistika mərkəzinə çevrilməsinə gətirib çıxaracaq”.
“Mən işğaldan azad edilmiş ərazilərimizdə Heydər Əliyev Fondu tərəfindən görülən işləri xüsusi olaraq qeyd etmək istərdim. Tarixi-dini memarlıq abidələrimizin bərpası prosesində Fond bilavasitə yaxından iştirak edir. Zəngilanda həyata keçirilən önəmli layihələrindən biri ilə - Zəngilan məscidinin bərpası ilə də Fond özü məşğul olur. Bu, Heydər Əliyev Fondunun və onun rəhbəri hörmətli Mehriban xanım Əliyevanın milli-mənəvi dəyərlərimizə verdiyi yüksək qiyməti təcəssüm etdirir”, - Milli Məclisin deputatı bildirib.
“Prezident İlham Əliyev Zəngilan rayonuna xüsusi nümayəndənin təyin olunması ilə bağlı çıxışında qeyd etdi ki, Zəngilan birinci rayondur ki, keçmiş məcburi köçkünlər yaxın gələcəkdə oraya qayıdacaqlar. İnanırıq ki, burada yaradılan sosial-iqtisadi şərait sakinlərin rahat yaşaması üçün əlverişli olacaq. Rayonun coğrafi mövqeyi və təbii sərvətləri burada biznesin inkişafına, məşğulluğun təmin olunmasına əlavə güc qatacaq. Həmçinin rayonun kənd təsərrüfatı potenisalı da yüksəkdir. Bu da rayonun iqtisadi inkişafına və məşğulluğun artmasına xeyli imkanlar yaradacaq və bütövlükdə bölgənin dirçəlməsinə təkan verəcək”,, - S.Möhbalıyev qeyd edib.
Вернуться назад