Bakıda məhəllələrdə bunu edənlər CƏZALANACAQ - RƏSMİ

Bakıda bəzi məhəllələrdə sakinlərin yollara süni maneələr quraşdırmasının şahidi oluruq. Bu hal yerli sakinləri qane etsə də yoldan istifadə edən sürücülərin heç də xoşun gəlmir.

Səbəb isə bu maneələrin avtomobillərə zərər vurmasıdır. Digər tərəfdən sakinlər də "trampilin"lər quraşdırılmadığı təqdirdə yolda avtomobillərin sürətlə hərəkət etməsindən narahat olurlar.

Mövcud vəziyyəti nəzərə alaraq məhəllələrə maneələr quraşdırılmasının nə qədər qanuni olmasını aydınlaşdırma çalışdıq. Daxili İşlər Nazirliyinin (DİN) Mətbuat xidmətinin əməkdaşı, polis kapitanı Nurlan Əliyev BAKU.WS-ə bildirib ki, yollarda avtomobillərin sürətini məcburi şəkildə azaltmaq məqsədilə qanunsuz olaraq quraşdırılan süni maneələrlə bağlı aşkar edilən faktlar və vətəndaşlar tərəfindən daxil olan müraciətlər əsasında polis aidiyyəti dövlət qurumlarının əməkdaşları birgə əraziyə baxış keçirir və həmin süni maneələrin sökülməsi təmin edilir:

"Bu kimi hüquqpozmalara yol verən şəxslər barəsində İnzibati Xətalar Məcəlləsinin 354-cü (yolların hərəkət hissəsində sədlərin, şlaqbaumların qurulmasına və nəqliyyat vasitələrinin hərəkətinin başqa üsullarla kəsilməsinə, yaxud avtomobil yollarında nəqliyyat vasitələrinin və piyadaların hərəkətinə maneələr yaradılmasına görə) maddəsinə əsasən inzibati tənbeh tədbiri tətbiq edilir".
Avtomobil və piyadaların hərəkətinə maneə yaratmağa görə cərimələri təqdim edirik:

Fiziki şəxslər 80 manatdan 100 manatadək
Vəzifəli şəxslər 400 manatdan 500 manatadək
Hüquqi şəxslər 3000 manatdan 4000 manatadək