Ukraynadan təxliyə olunan Azərbaycan vətəndaşları təşkilatçılara təşəkkür edib

“Əvvəlcə Moldovaya gəldik, sonra Ruminiyaya keçdik və oradan isə Bakıya gəldik”.

Bunu “Report”a açıqlamasında Ukraynadan təxliyə olunaraq Bakıya gətirilən Azərbaycan vətəndaşı Məhəbbət İlyasova deyib.

“Vətənimizə rahat gəlib çatdıq. Bizim qayıdışımızı təşkil edənlər sağ olsunlar, var olsunlar”, - o bildirib.

Fatimə Əhmədova isə bildirib ki, 14 ildir ailəsi ilə birgə Kiyevdə yaşayır: “Biz gəldik, amma atam orada qaldı. O, Kiyevi qorumağa hazır olduğunu dedi. İndi Azərbaycanda özümü təhlükəsiz və rahat hiss edirəm. Sadəcə olaraq, atam üçün narahatam və darıxıram”.

“Səfirliyimiz çox sağ olsun ki, Ukraynada qalan Azərbaycan vətəndaşlarının təxliyəsi üçün əlində gələni edir. Ümid edirəm ki, bundan sonra təxliyəsi həyata keçiriləcək digər vətəndaşlarımız da sağ-salamat Vətənə çatacaqlar”, - Bakıya təxliyə olunan Azərbaycan vətəndaşlarından biri deyib.

Xatırladaq ki, Ukraynadakı vəziyyətlə əlaqədar Rumıniyaya təxliyə olunmuş 176 Azərbaycan vətəndaşı AZAL-ın təyyarəsi ilə Bakıya gətirilib. Heydər Əliyev Beynəlxalq Hava Limanında onları yaxınları və qohumları qarşılayıb.

Qeyd edək ki, Rumıniya ilə əldə edilmiş razılıq əsasında Azərbaycan vətəndaşlarının tranzit keçidi üçün viza tələbi müvəqqəti olaraq qaldırılıb, vətəndaşlar tərəfindən yalnız səyahət sənədi təqdim edilir, COVID-19 pasportu və PCR testinin neqativ nəticəsi mütləq şəkildə tələb edilmir.